जळगाव, दि.२८ (जनसंवाद live): गेल्या अनेक दिवसांपासून खड्डेमय असलेल्या रिंगरोडचे भाग्य अखेर उजळले. जळगाव शहराचे लोकप्रिय आमदार मा. श्री. सुरेश दामू भोळे (राजूमामा) यांच्या सातत्यपूर्ण पाठपुरावा व अथक प्रयत्नांमुळे या महत्त्वाकांक्षी विकासकामाला प्रत्यक्ष सुरुवात झाली. जळगाव शहरातील वाहतूक व्यवस्था अधिक गतिमान व सुरक्षित करण्याच्या दृष्टीने महत्त्वपूर्ण ठरणाऱ्या रिंग रोड विकासकामाचे भूमिपूजन शनिवार दिनांक २७ रोजी संध्याकाळी बहिणाबाई उद्यानासमोरील परिसरात संपन्न झाले.
यावेळी भाजपा महानगर जिल्हाध्यक्ष श्री. दीपक सूर्यवंशी, महापौर सौ. दीपमाला काळे, उपमहापौर श्री. मनोज चौधरी, स्थायी समिती सभापती डॉ. चंद्रशेखर पाटील, सभागृह नेते श्री. नितीन लढ्ढा, गटनेते श्री. प्रकाश बालाणी, नगरसेवक श्री. चंद्रशेखर अत्तरदे, सौ. शुचिता हाडा, श्री. अमित काळे, सौ. अंकिता पाटील यांच्यासह भारतीय जनता पक्षाचे पदाधिकारी, नगरसेवक, मंडल अध्यक्ष, मोर्चा व आघाडीचे पदाधिकारी, शक्तिकेंद्र प्रमुख, बूथ प्रमुख, कार्यकर्ते तसेच परिसरातील नागरिक मोठ्या संख्येने उपस्थित होते.
याप्रसंगी आमदार सुरेश दामू भोळे (राजूमामा) यांनी सांगितले की, जळगाव शहराच्या सर्वांगीण विकासासाठी दर्जेदार व रुंद रस्ते निर्माण करणे ही काळाची गरज असून रिंग रोडच्या विकासामुळे शहरातील वाहतूक कोंडी कमी होण्यास, नागरिकांचा प्रवास अधिक सुरक्षित व सुलभ होण्यास तसेच शहराच्या विकासाला गती मिळण्यास मोठी मदत होणार आहे. शहरातील विविध विकासकामांसाठी आवश्यक निधी उपलब्ध करून आणखी पायाभूत सुविधा निर्माण करण्यासाठी सातत्याने पाठपुरावा सुरू असल्याचे त्यांनी यावेळी सांगितले.
उपस्थित मान्यवरांनीही या विकासकामामुळे परिसरातील नागरिकांना मोठा दिलासा मिळणार असल्याचे सांगत, काम उच्च दर्जाचे व निर्धारित कालावधीत पूर्ण करण्याची अपेक्षा व्यक्त केली.
भूमिपूजनानंतर उपस्थित मान्यवरांनी विकासकामाच्या यशस्वी व वेळेत पूर्णत्वासाठी शुभेच्छा व्यक्त केल्या.
