संवेदनशील कलाकारच नव्हे, तर शेती, मातीशी नाते जोडणारा माणूस काळाच्या पडद्याआड गेला.- अशोक भाऊ जैन

जळगाव, दि.८ (जनसंवाद live): “नाना पाटेकर यांच्या दुःखद निधनाची वार्ता समजली अतिव दुःख झाले. नानांच्या निधनाने एक संवेदनशील कलाकारच नव्हे, तर माती, शेती आणि शेतकऱ्यांशी मनापासून नाते जोडणारा जिव्हाळ्याचा माणूस काळाच्या पडद्याआड गेला आहे,” अशा शब्दांत जैन इरिगेशनचे अध्यक्ष अशोक जैन यांनी नाना पाटेकर यांच्या निधनाबद्दल भावना व्यक्त केल्या.

जैन इरिगेशन सिस्टिम्स लिमिटेड (जैन हिल्स) आणि नाना पाटेकर यांच्यातील स्नेहाच्या आठवणींना उजाळा देताना त्यांनी सांगितले की, नानांनी २००५ आणि २०१५ मध्ये जैन हिल्सला सदिच्छा भेट दिली होती. विशेषतः १६ ऑक्टोबर २०१५ रोजी मकरंद अनासपुरे आणि नाना पाटेकर यांच्या ‘नाम’ संस्थेच्या माध्यमातून शेतकऱ्यांसाठी जैन हिल्सला आयोजित कार्यक्रमात नाना आणि श्रद्धेय मोठ्याभाऊंची (भवरलालजी जैन) भेट झाली होती. शेती, माती आणि पाणी या विषयांवर दोघांमध्ये अत्यंत जिव्हाळ्याने सविस्तर संवाद झाला. तो केवळ औपचारिक संवाद नव्हता, तर मातीवर प्रेम करणाऱ्या दोन संवेदनशील व्यक्तींचा तो संवाद होता.

या भेटीत नानांनी जैन हिल्स येथील शेती संशोधन केंद्राला उत्सुकतेने भेट देऊन विविध शेती प्रयोगांची आस्थेने माहिती घेतली. जैन इरिगेशनने विकसित केलेल्या आंब्याच्या रोपांची त्यांनी आपल्या फार्म हाऊससाठी श्रद्धेय मोठेभाऊंकडे मागणी केली होती. त्यानंतर आंबा, पेरू, सीताफळ आणि नारळाची रोपे त्यांच्या फार्म हाऊसवर पाठविण्यात आली. नानांनी ही रोपे केवळ लावली नाहीत, तर मोठ्या प्रेमाने जोपासली. श्रद्धेय मोठेभाऊ, जैन परिवार आणि नाना पाटेकर यांच्यातील हा स्नेहाचा धागा शेती, माती, पाणी आणि माणुसकीने जोडलेला होता. नाना गेले, पण त्यांनी जपलेली ही नाळ आणि त्यांच्या आठवणी जैन हिल्सच्या मातीत कायम जिवंत असतील हे तितकेच खरे. त्यांच्या स्मृतींना विनम्र अभिवादन.